Flott video frá Lauf Forks úr Bláalónskeppninni 2014. Ég ásamt fleirum hjóluðum á léttasta demparagaffli í heimi í keppninni og skilaði ég mér í mark á innan við 2 tímum í 11. sæti. Kíkið á myndbandið og skoðið keppnissöguna eða horfið bara alla leið :)

Hvað á maður að gera við fleiri tugi klukkutíma af allskonar efni sem hefur komið úr Garmin Virb videovélinni í vor og sumar? Það er ekkert flókið nú þegar daginn tekur að stytta og kaldara verður í veðri, þá er akkúrat málið að byrja að horfa á skemmtileg myndbönd frá Mallorca og úr einhverjum vel völdum keppnum. 
Nú þegar eru komin tvenn myndbönd á síðuna og annað þeirra er ekkert annað en Bláalónsþrautin og hitt er frá 16. apríl á Mallorca þegar við hjóluðum frá Calvia niður til Port d'Andratx og upp til Valldemossa.
Myndböndin eru á undirsíðu undir video hér

Í kvöld fór fram þriðja umferð í Cube Prologue sem er stuttur sprettur, 7,2km niður Krísuvíkurveg. Keppt er í flokki tímatökuhjóla og götuhjóla. Það var erfitt að bíða í allan dag eftir keppninni því veðrið var svo gott að mig langaði út að hjóla og hjóla í allan dag. Ég tók góða upphitun með því að hjóla úr Grafarholtinu upp á krísuvíkurveg eða 30km leið og var klæddur í Lois Garneau skinsuit og með skóhlífar til að líkaminn taki minni vind. Ég hafði tekið eftir afslappaðri stöðu Óskars á hjólinu þegar hann sigraði mig síðast. Þannig að í kvöld ákvað ég að prufa að leggja framhandleggina fram á stýrið til að komast enn neðar. 

Ég stillti hjólið í réttan gír fyrir startið, létt mig renna rólega að rásstað án þess að smella mér úr, hélt jafnvæginu í smá stund á meðan ræsirinn greip í hnakkinn og hélt hjólinu fyrir mig. Hann hafði orð á því hve fagmannlegt þetta væri og hafði ég gaman af, enda á þessi keppni að vera skemmtileg.

Keppendur eru ræstir með 30 sek millibili og þarna hafði ég nægan tiíma til að undirbúa mig og vera viðbúinn því enginn tími fór til spillis við að stilla mér upp. 

Þegar ég ræsti af stað tók ég þétt af stað. Garmin Vector segir 1210 wött og strax bryjaði ég að raða niður gírum og þegar ég var kominn í hæsta gír fór ég beint með framhandleggina á stýrið og beigði mig sem mest niður, og viti menn ég fann bara hvernig loftmótstaðan og óhreinaloftið fyrir aftan haus og bak léttist einhvernveginn. Þegar ég kom að begijunnið við Bláfjallaffleggjara, fann ég hvernig mér leið vel og líklega er þar um að þakka æfingum fyrir hálfan Járnkarl og keppninni um að þakka en ég hjólaði 90km hjólalegg í liðakeppni á tímatökuhjóli þar sem staðan er mjög erfið á hjólinu. Ég fann allan tímann að ég var ferskur og langaði svo að ná Jóa sem var ræstur næst á undan mér en hann keyrði þétt og náði góðu þriðja sæti. Óskar var í örðu sæti og ég náði sigri með aðeins einni sekúndu. Ég hélt hærri púls en venjulega og meðalwött voru 392 en í síðustu keppni hélt ég 377 meðalwöttum. Að keppni lokinni hélt ég áfram að hjóla því ég hafði bitið það í mig að hjóla hátt í 100km í kvöldsólinni og fékk hringingu stuttu siíðar að ég hefði sigrað. 

Takk Tri, Garmin og Fiskmarkaðurinn fyrir stuðning og auðvitað keppinautarnir en Jói og Óskar voru þeir fyrstu með hamingjuóskir.

Bláalónið stóð vel að keppninni þetta árið og hér er afrakstur myndbands sem þau settu saman. Hér sést vel stemningin sem er í kringum keppnina og þvílíkt sjónarspil þegar 600 keppendur leggja af stað í þessa áskorun að hjóla frá Hafnarfirði um Djúpavatnsleið og enda í Bláalóninu. Að venju bregður mér fyrir á einum eða tveimur stöðum sem er gaman. Fyrir áhugasama þá er keppnissagan mín hér

Þetta er í annað sinn sem Alvogen Midnight Timetrial er haldið og núna var algjör niðsnúningur í hugarfari hjá mér. Í fyrra hafði ég litla trú á eigin ágæti í tímatökum en nú hafði mikið breyst þar. Eftir harðar æfingar í vetur samkvæmt æfingaáætlun og undirbúningsvinnu í vor fór ég í þol próf þar sem danski þjálfarinn okkar hvatti mig til að fara í tímatökukeppnir en niðurstöður þolprófsins bentu til þess að þær henti mér vel þar sem ég er mjög sterkur. Þyngdin vinnur ekki svo gégn mér á jafnsléttu en er mikill ókostur í brekkunum. Það var því ekkert annað að gera en að hugsa jákvætt um Tímatökukeppnir og njóta þess að pína sig.... lesa meira

Það var mikill heiður þegar Hjólamenn sem skipuleggja Jökulmíluna ákváðu að nota mynd af mér á plaggat og auglýsingu fyrir Jökulmíluna 2014. Þessi mynd hangir núna uppi í öllum hjólabúðum og stór auglýsing birtist í dag í sérblaði Fréttablaðsins, Fólk, þar sem hjólreiðar voru helsta umfjöllunarefnið.

Ég er að sjálfsögðu búinn að skrá mig í Jökulmíluna 2014 og treysti á að fá nýja svona mynd þar sem ég hef létt mig um 10 kg á milli ára og farinn úr stærð 6 niður í stærð 3 :)

Jökulmílan er ein af mínum uppáhaldskeppnum og eins og ég fjalla um í keppnissögunni frá því í fyrra tókst mjög vel upp með keppnina í fyrra.

Skráning fer fram hér: 
www.jokulmilan.is/ 

Hjólreiðafélag Reykjavíkur í samvinnu við Bílabúð Benna og Porsche héldu Criterium keppni í Hafnarfirði 15. maí. 
Criterium keppni fer þannig fram að keppendur hjóla  á braut sem er 1-2km og í þessari keppni fór A-hópur karla 14 hringi. 
Í ár var sú nýbreytni var að boðið var upp á þrjá flokka, A, B og C og var gerð sú krafa að C hópur hefði ekki tekið þátt í Criterium keppni áður. Þetta sló í gegn og var C hópur virkilega fjölmennur og ekki var annað að sjá en að allir hafa skemmt sér vel. Yfir 100 manns voru skráðir samtals í alla flokka og var líklega þreföldun á keppendafjölda á milli ára.

Nú er ferðalagið sem ég hóf í mars 2011 langt komið. Samtals eru farin 50kg og 20kg fóru af á þessu ári. Ég hjólaði 11þ km og varði yfir 500 tímum á hjólinu. Ég setti mér áramótaheit fyrir 2013 að hætta að drekka kók og stóðst það og hef tekið þá ákvörðun að byrja ekki aftur á slíkri drykkju. 
Með árangur í keppnum kom ég sjálfum mér ýtrekað á óvart. 

Ég vann mig úr sæti 88 í Bláalónskeppninni 2012í það 15. í ár og úr 44. sæti  í það 8. í Hvolsvallarkeppninni. 

Ég var oft hissa á sjálfum mér hve framarlega ég var og þó ég missti af fremsta hóp í Íslandsmeistaramótinu náði ég honum aftur. Ég náði mínum besta árangri á árinu í  tímakeppni í Heiðmörk, þar sem á sex tímum eru hjólaðir 123 km á möl, en þar náði ég öðru sæti. 

Eitt skemmtilegasta mómentið á árinu var þegar ég var ræstur aftast með ljónunum í Alvogen Midnight Time Trial en tilfinningin að taka af stað með þennan fjölda áhorfenda var mjög sterk upplifun. Þá var Jökulmílan mjög skemmtileg keppni og sú lengsta á árinu eða 160km þar sem ég endaði í 7. sæti. 

Að setja sér markmið fyrir árið 2014 er mjög erfitt. Það eru ekki mörg sæti eftir í þeim keppnum sem ég tók þátt í í sumar og keppinautarnir verða sífellt sterkari og mikil nýliðun er í hjólreiðum í dag.

Sömuleiðis er erfitt að setja sér lokatölu en ég verð þó að viðurkenna að 86kg er mjög skemmtileg tala, þá get ég sagt hafa losnað við 60kg en síðustu 10kg verða þó erfið

Líklega er best að setja sér markmið fyrir 2014 að hafa gaman af þessu :)

Lauf sem er léttasti demparagaffall í heimi og íslensk hönnun er komið undir Cube hjólið mitt. Get ekki beðið eftir að prufa þetta. Frábær aukajólagjöf og ekki verra þegar það er svona mikið carbon eða 950gr. Er mjög ánægður með litasamsetninguna. Kærar þakkir fá snillingarnir hjá www.laufforks.com en þeir tóku eftir sögunni minni og fannst við hæfi að ég fengi léttari demparagaffal. Úr varð að ég fékk þennan að láni til að prufa og ætla ég mér að njóta vel :)
Þessi gaffall er að fá mjög góða umfjöllun í stóru fjallahjólablöðunum útí heimi og hafa þeir fengið verðskuldað hrós fyrir góða hönnun. 

Ég var mjög upp með mér þegar blaðamaður Morgunblaðsins, Malín Brand, hafði samband við mig og vildi fá viðtal við mig fyrir daglegt líf en á þriðjudögum er ávalt þema um útivist og hreifingu og fannst henni hreint út sagt magnað að nokkur maður hjólar á þessum árstíma í hvernig veðri og færð sem er. Eftir hálftíma spjall varð þetta útkoman og hún og vonandi fleiri uppvísari af hjólreiðum á íslandi.



Hér má lesa viðtalið

Það verður seint þakkað fyrir allan þann góða félagsskap og stuðning sem ég hef fengið allt frá því ég byrjaði á þessu ævintýri vorið 2011 og allt eru þetta miklir vinir mínir í dag. 
Það var einmitt það sumar sem ég kynntist Valda í gegnum Reiðhjólabændur og þegar hann óskaði eftir félagskap á morgnanna til að hjóla var ég ekki lengi að bjóða mér með. Í morgun kl 6:40 hittumst við í Fossvogsdalnum og hjóluðum þar til við fundum lykt af kaffi, hafragraut og nutella en það var að sjálfsögðu auðfundið á heimili Hjólreiðamanns og konu ársins, margfaldra íslandsmeistara og umfram allt gott fólk. 

Hafsteinn Ægir og María Ögn buðu okkur velkominn og að loknum snæðingi fylgdum við Hafsteini til vinnu og svo var mér skilað í mína vinnu áður en Valdi hélt sína leið. 
Það er bara eitthvað við það að vakna snemma og skella sér út í hvernig veður sem er og hjóla, það að sigrast á veðrinu er frábær tilfinning.
Dagurinn var svo toppaður með því að smygla mér á æfingu hjá Tind eftir 11 tíma vinnudag og ekki var úrvalið af góðu fólki verra þar. 
Þetta er mesta snilldin við hjólreiðar á Íslandi. Það eru allir vinir, óháð félagi, stöðu og getu. Allir geta hjólað saman og notið útiverunnar. Frábær dagur og takk fyrir mig.

Sumarið 2012 var ég bílstjóri í WOW Cyclothon ásamt Alberti Þjálfara HFR. Við keyrðum sigurliðið Piltana en á 41 klst gefst mönnum mikill tími til að spjalla. Ég og Albert ræddum aukakílóin fram og til baka á 2 svefnlausum sólarhringum umhveris landið milli þess sem við aðstoðuðum piltana eins mikið og við gátum. Við suðum saman fínt plan fyrir mig sem mér fannst henta mér. Ég í raun sameinaði ég gömlu og nýju leiðina. Gamla leiðin er bara hjóla mikið, á lágu erfiði en nýja leiðin er mun hnitmiðaðari æfingar þar sem teknir eru sprettir á hárnákvæmum púls, wöttum og snúningshraða í ákveðið langan tíma og endurtekningar sem danski þjálfari liðsins semur fyrir hvern og einn. Úr varð að ég hjólaði mikið en ekki of mikið, 9 tímar á viku varð töfratalan mín. Ég reyndi að hjóla eitthvað á hverjum degi, stundum bara rólega en alltaf tók ég þrjá spretti á hverri æfingu, stundum langa og stundum stutta. Þetta fann ég bara hjá sjálfum mér en markmiðið var að verða alls ekki þreyttur en samt að kveikja á kerfinu með því að keyra púlsinn í topp í þrígang og alls ekki að koma heim svangur, þannig náði ég að búa til kerfi sem gerði það að verkum að ég brendi fitu án þess aðkoma heim og ráðast á alla skápa og leita af kolvetnum. Yfirleitt voru þessar æfingar gerðar að kvöldi til, beint heim, ekkert að borða og beint í háttinn. Þannig þurfti líkaminn að endurbyggja (recovery) með orku sem fyrir var. Kannski hentar þessi leið ekki öllum, en klárt mál er að hún hentaði mér. Albert á skilið hrós og mikið þakklæti því alltaf hefur hann gefið sér mikinn tíma í spjall og mörg hafa símtölinn verið þar sem ég hef fengið góð ráð hjá honum sem mörg hver hafa reynst mér vel. 

Leiðin til betra lífs

Emil Tumi hefur gert tímamótasamning en hann mun hjóla fyrir De Jonge Renner sem er ungliða lið (Junior) Atvinnumannaliðsins Belkin. Emil Tumi sem er einungis 17 ára hjólaði fyrir Team Commentor í Danmörku og stóð sig vel. 

Liðið er staðsett í Hollandi og verður spennandi að fylgjast með honum í framtíðinni. 

Ég get varla hamið mig af stolti þar sem ég er mikill aðdáandi þessa drengs. Ég hef hjólað með honum bæði í keppnum og á æfingum hér á landi og einu sinni hef ég heimsótt hann til Danmerkur og hjólað með honum þar. Það að þekkja svona metnaðarfulla drengi fulla af drifkrafti hefur gert mér gríðarlega gott í minni baráttu og það er þakkarvert.

Gangi þér vel Emil Tumi

http://dejongerenner.nl/